У Гродне з 25 красавіка па 2 мая пройдзе ХІІ Нацыянальная філатэлістычная выстаўка “Белфіла”. Аб гэтым паведамілі БЕЛТА ў Міністэрстве сувязі і інфарматызацыі.
На “Белфіла-2025” можна азнаёміцца з дасягненнямі як айчынных, так і замежных калекцыянераў, а таксама даведацца больш аб культуры і гісторыі Беларусі і іншых краін праз прызму філатэліі. Выстаўка прысвечана 80-годдзю Перамогі савецкага народа ў Вялікай Айчыннай вайне.
На выстаўцы будуць прадстаўлены рэдкія экспанаты, сярод якіх салдацкія трохвугольныя пісьмы часоў Вялікай Айчыннай вайны, тэлеграма, адпраўленая ў партызанскае злучэнне на тэрыторыі Беларусі з Вялікай зямлі ў красавіку 1944 года, дамарачныя пісьмы Масквы, Мінска, Брэста і Гродна ХІХ стагоддзя, Санкт-Пецярбурга сярэдзіны XVIII стагоддзя і іншыя. У мерапрыемстве прымуць удзел прадстаўнікі Беларусі, Арменіі, Ізраіля, Кыргызстана, Марока, Малдовы, Расіі, Славакіі і іншых краін. Усяго прэзентуюць больш за 100 унікальных калекцый.
Месца правядзення: Гродзенская выставачная зала, вул.Ажэшка, 38. Выстаўка арганізавана Міністэрствам сувязі і інфарматызацыі, РУБ “Белпошта”, Дзяржаўным пагранічным камітэтам і ГА “Беларускі саюз філатэлістаў”.