У дзень 134-й гадавіны з дня нараджэння самага маладога класіка беларускай літаратуры ў Музеі Максіма Багдановіча адбылося мерапрыемства “Дзе леты першыя прайшлі…”, прымеркаванае да гэтай святочнай даты.

Удзельнікамі мерапрыемства сталі вучні 8 класаў ДУА “Сярэдняя школа № 38 імя К.Тураўскага г. Гродна”, якія змаглі акунуцца ў свет дзяцінства і творчасці паэта.

Сустрэча была арганізавана ў інтэрактыўнай форме. Навуковыя супрацоўнікі музея падрыхтавалі для школьнікаў заданні на трох тэматычных лакацыях. За паспяховае выкананне заданняў вучні атрымлівалі адзнакі ў сваіх “падарожных” лістах.

Першая тэматычная лакацыя была прысвечана знаёмству з горадам Гродна, дзе прайшлі дзіцячыя гады паэта. У гульнёвай форме вучні “перанесліся” ў губернскі горад канца XIX стагоддзя. Яны даведаліся пра пераезд сям’і Багдановічаў з Мінска, пра раён іх пражывання, пра храм, у якім былі ахрышчаны малодшыя дзеці Багдановічаў, а таксама пра тагачасныя назвы вуліц і будынкі, што сталі часткай іх сямейнай гісторыі.

На другой лакацыі вучняў чакаў займальны майстар-клас па вырабе сувенірнага магніта з каляровымі выявамі і цытатамі з твораў Максіма Багдановіча.

Трэцяя лакацыя была прысвечана гісторыі фатаграфіі і фотаздымкам з сямейнага фотаальбома Багдановічаў. Школьнікі пазнаёміліся таксама з фотаапаратамі і абсталяваннем для фатаграфавання канца ХІХ ст. Напрыканцы мерапрыемства кожны ўдзельнік атрымаў падарунак на памяць – уласны фотаздымак.

Мерапрыемства дазволіла школьнікам паглыбіць свае веды пра жыццё і творчасць паэта, выкарыстаць творчыя магчымасці і дакрануцца да гісторыі і культуры эпохі, у якую жыў Максім Багдановіч.