З 7 лютага ў Новым замку пачынаецца экспанаванне выстаўкі “Гродна на старых картах і планах”. Прадстаўленыя на выстаўцы карты і планы горада Гродна ахопліваюць часавы перыяд з пачатку XVIII да сярэдзіны ХХ ст. Самы стары план, так званы “Стакгольмскі план” 1706 г., намаляваны шведскімі вайсковымі картографамі, уяўляе сабой выяву расійскіх вайсковых умацаванняў Гродна часоў Паўночнай вайны. Пазнейшы з прэзентаваных на выстаўцы – нямецкі план Гродна 1940 г., на які савецкія падпольшчыкі нанеслі месца размяшчэння вайсковых частак фашысцкіх акупантаў.

З фондаў Расійскага ваенна-гістарычнага архіва на выстаўцы прадстаўлены планы Гродна 1783 і 1795 гадоў. План 1783 г., створаны гродзенскім землямерам Юзафам Маркевічам, унікальны і вельмі важны для даследчыкаў – на ім паказаны ўласнікі ўсіх дамоў Гродна амаль два з паловай стагоддзі таму. На адноўленым музейнымі рэстаўратарамі плане 1882 г. можна ўбачыць Гродна, якога ніколі не было, – гэта першы генеральны план разбудовы Гродна, што не быў рэалізаваны па прычыне страшнага пажару 1885 г. Увагу прыцягвае так званы “план землямера Аўгусцінка”, створаны ў 1931 г., – першы дакладны план нашага горада, што служыў гарадскім службам да канца 1950-х гг.

Усяго на выстаўцы можна ўбачыць больш за дваццаць карт і планаў Гродна і асобных частак нашага горада.

Выстаўка працуе: штодзённа (акрамя панядзелка) з 10.00 да 18.00. Кошт: 3 рублі для ўсіх катэгорый наведвальнікаў.