З 24 мая 2025 г. у Музеі гісторыі Гарадніцы дзейнічае выстаўка “Дзівосны свет вышыўкі”.  У экспазіцыі выстаўкі: калекцыя вышываных прац 1950 – 1960-х гг. з фондаў музея, якія выкарыстоўваліся як дэкаратыўны элемент хатняга інтэр’ера. Сярод экспанатаў – карціны, пано, абрусы, дарожкі, сурвэткі, кашпо, ігольніцы і іншыя, выкананыя ў тэхніках крыж, паўкрыж, гладзь, мярэжка, рышэлье.

Вышыўка ў 1950 – 1960-я гады – адзін з найбольш папулярных і распаўсюджаных відаў рукадзелля. Гэта тлумачыцца моднымі тэндэнцыямі таго часу, калі мастацтва вышыўкі перажывала новы ўздым і было масавым захапленнем большасці жанчын. Вышытыя дэкаратыўныя пано афармлялі ў рамы або па краях прышывалі звычайную арнаментальную тасьму. Вышыўкамі ўпрыгожвалі сцены ў пакоях, экраны тэлевізараў, буфеты, сталы, этажэркі. Сюжэты вышываных работ былі разнастайнымі: ад простых кампазіцый да рэпрадукцый карцін вядомых мастакоў. Для вышывання выкарыстоўвалі схемы на паперы і гатовыя трафарэты з рознымі малюнкамі, надрукаванымі на тканіне, якія выпускалі прадпрыемствы лёгкай прамысловасці СССР.