Абмен віртуальнымі выстаўкамі паміж Гродзенскім дзяржаўным гісторыка-археалагічным музеем і Нацыянальным музеем Рэспублікі Комі стаў добрай традыцыяй. Ужо чацвёрты год запар музеі дзеляцца віртуальнымі экспазіцыямі, якія папулярызуюць гісторыка-культурную спадчыну сваіх рэгіёнаў. Дыялог культур, праяўлены ў рамках гэтых выставак, дае магчымасць дзяліцца сваімі ведамі і вопытам з калегамі, а таксама пашырае аўдыторыю.
Віртуальная выстаўка “Жанчына – маці, майстрыха, прыгажуня” па зале адкрытага паказу фондаў аддзела этнаграфіі Нацыянальнага музея Рэспублікі Комі створана на аснове лепшых узораў калекцыі традыцыйнага жаночага рукадзелля фіна-ўгорскіх народаў.
Жаночая культура яскрава адлюстроўвае як этнічныя асаблівасці народа, так і агульныя з роднаснымі этнасамі рысы, уплывы і запазычанні. Гэта адносіцца, перш за ўсё, да традыцыйнага жаночага касцюма, прадметаў ткацтва, вышыўкі, вязання.
Роля жанчыны ў сям’і была вялізнай (як казалі, «без гаспадыні і дом не дом»). Разам з выхаваннем дзяцей, прыгатаваннем ежы, уборкай, доглядам жывёлы, жанчыны займаліся рамёствамі, якія былі спосабам выказаць сябе, стварыць свой свет.
Гродзенскі дзяржаўны гісторыка-археалагічны музей прэзентаваў анлайн-выстаўку «Ствараючы брэнды. Гісторыі гродзенскіх прадпрыемстваў канца XIX – пачатку XX стагоддзя», якая апускае нас у гісторыю развіцця прамысловасці Гродзеншчыны.
Выстаўка раскрывае ўнікальныя аспекты станаўлення буйных гродзенскіх прадпрыемстваў, такіх як: тытунёвая фабрыка Шарашэўскага, фабрыка ровараў і матацыклаў, фабрыка ігральных карт Лапіных, Нёманская фабрыка пераплётных вырабаў і інш.
Прадстаўленыя экспанаты – ад этыкетак і рэкламных плакатаў да ўзораў прадукцыі і фатаграфій – дазваляюць адчуць атмасферу эпохі і зразумець, як ствараліся брэнды Прынёманскага краю, актуальнасць якіх захоўваецца і сёння.
Выстаўкі даступныя на афіцыйных сайтах двух музеяў.
https://projects.museumtur.ru/zhenschina-mama/
https://grodno-museum.by/present/brendy/