Аўтар: Мудрэнка Якаў Кірылавіч
Месца і дата стварэння: Палявая пошта “45828”, 1943/11/15, прагледжаны ваеннай цэнзурай “09465”
Ідэнтыфікацыйны нумар: КП 9689
Назва музея: Установа культуры “Ваўкавыскі ваенна-гістарычны музей імя П.І. Баграціёна”
Апісанне і гісторыя прадмета:
Ліст з фронту Мудрэнка Якава Кірылавіча да сваёй жонкі Веры і маці, ліст адрасаваны ў г. Арцёмаўск, вул. Лермантаўская, д. 14. Аўтар ліста звяртаецца да сваіх родных і паведамляе, што салдат, які быў у іх родным горадзе, расказаў яму аб тым, як яны жылі пры нямецкай акупацыі і якія цяжкасці ім давялося перажыць.
У лісце Якаў Мудрэнка абяцае забяспечыць усім жыццёва неабходным сваю сям’ю. Лічыць самым важным – выгнаць з роднай зямлі нямецкіх акупантаў: “Осталось решить самое основное – изгнать с нашей священной земли коричневую чуму – немецких оккупантов, а потом жизнь пойдет по-прежнему весело и хорошо”. Далей аўтар удакладняе, што ён на фронце, а родныя яго ў тыле і ён прыкладзе ўсе намаганні, каб выканаць ускладзенную на яго місію. У лісце Якаў Кірылавіч піша аб узнагародах і дасылае сваёй жонцы даведку аб ордэнах, якімі быў узнагароджаны, з надзеяй, што яна спатрэбіцца ў жыцці, а таксама перасылае 1300 рублёў. Віншуе з 26-й гадавінай Вялікай Кастрычніцкай рэвалюцыі і жадае ўсяго найлепшага ў жыцці і працы. Ліст завяршаецца прывітаннем да родных і знаёмых.
Мудрэнка Якаў Кірылавіч нарадзіўся 19 красавіка 1910 года ў сяле Нячаева Кіеўскай вобласці. Скончыў Чаркаскі педагагічны інстытут. У Чырвонай Арміі з 1932 г. У маі 1942 г. маёр Мудрэнка быў прызначаны начальнікам штаба палка, у снежні – намеснікам камандзіра 420-га артылерыйскага палка АРГК (Артылерыя рэзерву галоўнага камандавання). З чэрвеня 1943 г. – камандзір 475-га армейскага мінамётнага палка, які з баямі дайшоў да Ваўкавыска. Байцам палка была пастаўлена задача вызваліць горад, наступленне пачалося з боку Зэльвы раніцай 14 ліпеня 1944 г. Многія прасёлачныя дарогі і масты праз рэкі былі замініраваны. На адной з такіх мін падарваўся падпалкоўнік Я.К. Мудрэнка. Ваеннаслужачыя, якія знаходзіліся ў той момант каля камандзіра, разабралі некалькі апошніх слоў сказаных ім: “Дорогие мои… не удалось… с вами до Победы…”. Падпалкоўнік Мудрэнка загінуў 14 ліпеня 1944 г., пахаваны ў г. Ваўкавыск.
У 1964 годзе, напярэдадні 20-годдзя вызвалення г. Ваўкавыск ад нямецка-фашысцкіх захопнікаў вуліца Крынічная была перайменавана ў вуліцу імя Якава Мудрэнка.
Узнагароды: ордэн Чырвойнай Зоркі, ордэн Чырвонага Сцяга, ордэн Вялікай Айчыннай вайны I ступені, ордэн Аляксандра Неўскага, медалі.
Гісторыя прадмета: Ліст Я.К. Мудрэнка быў дасланы ў Ваўкавыскі музей з г. Калінінград Зуевічам Рыгорам Аляксеевічам, галоўным рэдактарам газеты “Ветеран янтарных рубежей”.