Штогод 21 лютага адзначаецца Сусветны дзень экскурсавода. Ён быў заснаваны Сусветнай федэрацыяй асацыяцый экскурсаводаў (гідаў).

Дзень экскурсавода святкуюць супрацоўнікі турыстычных агенцтваў, музеяў, спецыялітсы іншых устаноў, дзе праводзяць экскурсіі, знаёмяць турыстаў з культурай роднай краіны, яе гісторыяй, славутасцямі і традыцыямі.

Для Гродзенскага дзяржаўнага гісторыка-археалагічнага музея Дзень экскурсавода – значная падзея.

21 лютага наш музей правёў акцыю “Юныя экскурсаводы” для вучняў ДУА “Сярэдняя школа № 38 імя К. Тураўскага”. Школьнікі пазнаёміліся з асноўнымі накірункамі работы навуковых супрацоўнікаў, якія праводзяць экскурсіі, тэматычныя заняткі, квэсты, даведаліся таксама пра тое, як будуюцца сучасныя музейныя экспазіцыі з розным інтэрактыўным абсталяваннем.

Вучні вызначылі важнасць і значнасць культурна-адукацыйнай дзейнасці музея, пазнаёміліся з новай экспазіцыяй “Пасляваенны Гродна. Гродзеншчына ў канцы ХХ – пачатку ХХІ ст.”, а таксама паспяхова выканалі заданні да папулярнага сярод наведвальнікаў квэста “Будзь сябрам прыродзе”.

Такая форма работы з маладымі людзьмі вельмі важная. Вучні, якія зацікавяцца дадзенай прафесіяй, змогуць паступіць у вышэйшыя навучальныя ўстановы нашай краіны, у будучым стаць кваліфікаванымі спецыялістамі ў сферы турызму і музейнай справы.