Нацыянальны музей Рэспублікі Комі і Гродзенскі дзяржаўны гісторыка-археалагічны музей Рэспублікі Беларусь у фармаце міжмузейнага супрацоўніцтва, якое працягваецца ўжо тры гады, абмяняліся новымі мультымедыйнымі выстаўкамі. Мэтай такіх віртуальных выставак з’яўляецца захаванне і папулярызацыя гісторыка-культурнай спадчыны народаў, развіццё міжмузейнага партнёрства. Выстаўкі ствараюць дыялог культур, дазваляюць захапіцца прыгажосцю народнага майстэрства.

Выстаўка “Моя любовь – кап и сувель”, прысвечаная памяці народнага майстра Расіі Васіля Васільевіча Папова, прадстаўлена на сайце Гродзенскага дзяржаўнага гісторыка-археалагічнага музея.

Васіль Папоў – майстар мастацкай апрацоўкі капа, капакораня і сувелі – аднаго з яркіх напрамкаў дэкаратыўна-прыкладнога мастацтва Рэспублікі Комі. Яго вядомыя, гарманічныя па форме вырабы, быццам бы самыя просяцца ў рукі, з’яўляюцца ў сваім родзе візітнай карткай Рэспублікі Комі, разляцеліся па свеце ў якасці падарункаў, сувеніраў, увайшлі ў музейныя зборы Расіі.

На выстаўцы прадстаўлены работы майстра з фондаў Нацыянальнага музея Рэспублікі Комі і прыватнай калекцыі сям’і Паповых.

У сваю чаргу музей Рэспублікі Беларусь прадставіў выстаўку “Ручнікі Прынямоння”.

На анлайн-выстаўцы «Ручнікі Прынямоння» прадстаўлена этнаграфічная калекцыя ручнікоў Гродзенскага дзяржаўнага гісторыка-археалагічнага музея. Абрадавы вышыты ручнік – прадмет народнай культуры і творчасці беларусаў. Традыцыйны ручнік – адна з самых знакавых з’яў у матэрыяльнай і духоўнай культуры беларусаў.

Ручнікі Прынямоння адрозніваюцца дэкаратыўнай стрыманасцю, гармоніяй тэхналагічнага малюнка і мастацкіх асаблівасцяў, суразмернасцю дэталяў у кампазіцыйным рашэнні, выразнасцю арнаменту і разнастайнасцю матываў. На выстаўцы паказаны так званыя гродзенскія “белыя” і “пераборныя” ручнікі канца ХIХ – сярэдзіны ХХ стагоддзя.

Выстаўкі даступныя на афіцыйных сайтах двух музеяў – “Ручнікі Прынямоння” і “Моя любовь – кап и сувель”.