Брэсцкая вобласць 2 чэрвеня прэзентуе ў Мінску гала-канцэрт на рэспубліканскім фестывалі “Беларусь – мая песня”, паведамілі карэспандэнту БЕЛТА ў прэс-службе Брэсцкага аблвыканкама.
Для гасцей падрыхтавалі мноства сюрпрызаў. Усіх таямніц не раскрываюць, аднак пра некалькі цікавых момантаў ужо вядома. У фае Палаца Рэспублікі гасцей будзе сустракаць сімвал Брэсцкай вобласці – зменшаная копія скульптуры зубра, размешчанай на трасе М1. Будзе магчымасць паразмаўляць з брэсцкім ліхтаршчыкам.
“На галоўнай сцэне Палаца Рэспублікі Брэсцкая вобласць прыадкрые заслону ўнікальнасці і непадобнасці рэгіёна, прадэманструе ўсё багацце і шматграннасць культурнай палітры. Для фестывалю мы падрыхтавалі выставу “1 рэгіён – 85…” і маштабны гала-канцэрт “Мы створаны гэтай зямлёй”, – расказалі ў прэс-службе Брэсцкага аблвыканкама. Выстава будзе складацца з 12 лакацый. Наведвальнікі змогуць азнаёміцца з гістарычнай і культурнай спадчынай Брэстчыны, з яе турыстычнымі брэндамі.
У гала-канцэрце прымуць удзел каля 1,5 тыс. чалавек – больш за 50 творчых калектываў, каля 30 вакалістаў і інструменталістаў. Для шоу выкарыстаюць шматлікія тэхнічныя сродкі і спецэфекты. Канцэртная праграма атрымалася разнастайнай па тэматыцы і жанравых напрамках. Так, на сцэне Палаца Рэспублікі ўпершыню прагучыць музычны твор да 85-годдзя Брэсцкай вобласці. Яркім абяцае стаць выступленне вялікага зводнага духавога аркестра, які аб’яднае пяць калектываў.
“Кожны госць стане ўладальнікам паштоўкі, выкананай навучэнцамі дзіцячых школ мастацтваў Брэсцкай вобласці ў рамках акцыі “Брэстчына вачыма дзяцей”. Акрамя таго, гледачы, выкарыстоўваючы QR-код на сваіх запрашальных білетах, змогуць адкрыць прэзентацыйны ролік аб Брэсцкай вобласці і паглыбіцца ў свет прыгажосці і гісторыі нашага любімага рэгіёна”, – дадалі ў прэс-службе.
