Якія канцэртныя праграмы пройдуць у Летнім амфітэатры ў час XXXIV Міжнароднага фестывалю мастацтваў “Славянскі базар у Віцебску”, карэспандэнту БЕЛТА паведамілі ў Цэнтры культуры “Віцебск”.
Паклоннікі галоўнай музычнай падзеі года змогуць ужо з 2 красавіка набыць білеты на канцэрты ў Летнім амфітэатры. Тут праграма фестывалю стартуе 9 ліпеня незабыўнай рок-уверцюрай.
Урачыстае адкрыццё збярэ гасцей фестывалю 10 ліпеня. Аматары эстрады сустрэнуцца з вядомымі спевакамі і калектывамі з Беларусі і Расіі.
Канцэрт Саюзнай дзяржавы можна наведаць 11 ліпеня. Перад гледачамі выступяць зоркі расійскай і беларускай эстрады. У начной праграме – залатыя рэтрахіты ў выкананні ансамбляў “Лейся песня”, “Зямляне”, “Божая кароўка”, “Браты Грым”, “Рок-астравы” і іншых вядомых груп.
Каманды КВЗ чарговы раз разыграюць фестывальны кубак вясёлых і знаходлівых 12 ліпеня, і ў гэты ж дзень адбудзецца першы тур XXXIV Міжнароднага конкурсу выканаўцаў эстраднай песні “Віцебск”.
Са “Славянскім базарам” гледачы развітаюцца 13 ліпеня. На гэтым праграма фестывалю не завершыцца. Паклоннікі шансона 14 ліпеня змогуць убачыць у Летнім амфітэатры любімых артыстаў.
Асноўныя мерапрыемствы XXXIV Міжнароднага фестывалю мастацтваў “Славянскі базар у Віцебску” пройдуць з 10 па 13 ліпеня, але гасцей форуму чакаюць у абласным цэнтры ўжо з 8 ліпеня.
