Выстава “Лета – маленькае жыццё!”, падрыхтаваная з фондавых калекцый НЦСІ, пачне работу ў Нацыянальным цэнтры сучасных мастацтваў 26 ліпеня. Аб гэтым паведамілі карэспандэнту БЕЛТА ва ўстанове.

Творы жывапісу, графікі, скульптуры дапамогуць акунуцца ў свет, дзе лета ўвасабляе цэлы сусвет яркіх эмоцый і момантаў. Праз прызму мастацтва раскрываецца індывідуальнае ўспрыманне мастакамі лета: дзіцячыя ўспаміны, мімалётныя прыродныя матывы, пачуццё свабоды і лёгкасці, а таксама глыбокія медытацыі на тэму жыцця і часу. Па словах арганізатараў, экспазіцыя прапануе не проста атрымаць асалоду ад мастацтва, але і пагрузіцца ў яго, перажыць моманты, якія, магчыма, ужо даўно забытыя, ці наадварот, захаваць у сэрцы толькі што здабытыя ўражанні.

Выстава працягнецца да 5 верасня. Наведаць яе можна з серады па нядзелю з 12.00 да 20.00.