Сёння споўнілася 65 гадоў з дня заснавання Беларускага дзяржаўнага архіва-музея літаратуры і мастацтва (БДАМЛМ).
Архіў-музей – адзін з вядучых рэспубліканскіх дзяржаўных устаноў Беларусі. Ён размешчаны ў будынку былога касцёла бернардзінцаў у Мінску – помніка архітэктуры барока XVII стагоддзя. У ім захоўваюцца ўнікальныя дакументы і матэрыялы, звязаныя з гісторыяй станаўлення і развіцця беларускай літаратуры, выяўленчага і сцэнічнага мастацтва, музычнага жыцця, айчыннага кінематографа.
Беларускі дзяржаўны архіў-музей літаратуры і мастацтва быў створаны 9 чэрвеня 1960 года як Цэнтральны дзяржаўны архіў літаратуры і мастацтва БССР, але ўжо 24 сакавіка 1976 года быў рэарганізаваны ў Цэнтральны дзяржаўны архіў-музей літаратуры і мастацтва БССР. У маі 1993 года ён атрымаў сучасную назву – Беларускі дзяржаўны архіў-музей літаратуры і мастацтва.
Музей валодае багатым фондам, што ўключае больш за 130 тыс. адзінак захоўвання, сярод якіх 728 музейных прадметаў. Навукова-даведачная бібліятэка налічвае амаль 33 тыс. кніг, больш за 50 тыс. часопісаў і газет. Храналагічна экспанаты ахопліваюць перыяд з 1812 года да нашых дзён, некаторыя з матэрыялаў з’яўляюцца копіямі дакументаў XIII-XIX стагоддзяў. Экспанаты, прадстаўленыя ў музеі, не толькі былі сабраны з архіваў на тэрыторыі Беларусі, але і прывезены з іншых краін.
У БДАМЛМ захоўваюцца асабістыя фонды дзеячаў культуры: пісьменнікаў М.Багдановіча, Я.Брыля, Я.Коласа, Я.Купалы, кампазітараў А.Багатырова, Г.Вагнера, Я.Глебава, мастакоў і скульптараў І.Ахрэмчыка, С.Селіханава і інш. Таксама ёсць унікальныя і асабліва каштоўныя дакументы, кнігі і выданні, сярод якіх часопісы “Маладняк”, “Узвышша”, запісная кніжка бацькі пісьменніка і мастака К.Каганца, стараверскі перадрук Псалтыры 1645 года, зроблены ў 1849 годзе, пісьмо М.Шагала з Парыжа Ю.Пэну, першыя выданні зборнікаў Я.Купалы “Жалейка” і Я.Коласа “Песні-жальбы” і інш.
Таксама ў архіве-музеі прадстаўлены калекцыі фалерыстыкі, тканін, фотапартрэтаў, скульптур, музычных інструментаў, гадзіннікаў, драўляных вырабаў, посуду, пісьмовых прылад.
Музей-архіў вядзе навукова-даследчую дзейнасць самастойна, а таксама сумесна з навукова-даследчымі ўстановамі Беларусі і іншых краін. Выдае дакументальныя зборнікі, калектыўныя навуковыя працы, манаграфіі па актуальных пытаннях гісторыі літаратуры і мастацтва Беларусі, архівазнаўства, археаграфіі. Таксама займаецца арганізацыяй выстаў і іншых масавых мерапрыемстваў з выкарыстаннем дакументаў БДАМЛМ. На яго базе праводзяцца розныя тэматычныя мерапрыемствы, якія прыцягваюць увагу да гісторыка-культурнай спадчыны Беларусі.
