Здымкі фільма “Бацька Мінай. Партызанская легенда” плануюць пачаць у канцы лютага 2025 года, заявіў генеральны дырэктар студыі “Ваенфільм”, народны артыст РФ, кінарэжысёр Ігар Угольнікаў у час падпісання дагавора аб вытворчасці фільма, перадае карэспандэнт БЕЛТА.
“Сёння, 7 кастрычніка, у Музеі гісторыі ВАВ у Мінску мы падпісваем дагавор аб супрацоўніцтве і вытворчасці фільма “Бацька Мінай. Партызанская легенда” паміж маскоўскай студыяй “Ваенфільм” і Нацыянальнай кінастудыяй “Беларусьфільм”. Згодна з цяперашнім каляндарна-пастановачным планам мы плануем пачаць здымкі 23 лютага”, – адзначыў Ігар Угольнікаў.
Ён падкрэсліў, што гэта добрая дата для пачатку здымак фільма пра Вялікую Айчынную вайну, і такія кінакарціны, як “Брэсцкая крэпасць” і “Народнае апалчэнне”, таксама пачыналі здымацца ў важныя даты. Так, здымкі “Брэсцкай крэпасці” пачаліся 22 чэрвеня, а “Народнага апалчэння” – 3 ліпеня, калі Сталін звярнуўся да народаў Савецкага Саюза з заклікам збіраць апалчэнне.
“З гэтага дня пачынаецца актыўная падрыхтоўка не толькі па падборы акцёраў, але і па ўсіх вытворчых пытаннях. У фільме будуць усе 4 пары года, таму работа наперадзе вялікая, але я думаю, што мы справімся, паколькі як трэба рыхтуемся да здымак. Фільм падтрыманы Расійскім фондам кіно і Міністэрствам культуры Беларусі. Сцэнарый прымаўся ўжо на спецыяльнай камісіі, экспертным савеце Міністэрства культуры. Мы атрымалі станоўчую ацэнку, былі ўнесены некаторыя папраўкі”, – сказаў Ігар Угольнікаў.
“Я практычна закончыў рэжысёрскі сцэнарый, перадам яго ў “Беларусьфільм” літаральна на гэтым тыдні, і мы пачнём падрыхтоўку. Расійска-беларуская здымачная група будзе сабрана па прынцыпе лепшых прафесіяналаў, якія працуюць у Маскве і Мінску. Здымаць мы будзем большай часткай у Смалявічах, але некалькі вялікіх батальных сцэн – на кінастудыі ў Маскве”, – дадаў кінарэжысёр. Ён таксама заўважыў, што яму цікава папрацаваць з беларускімі акцёрамі, але, вядома, у фільме будуць і расіяне.
Паводле слоў Ігара Угольнікава, кінакарціна павінна выйсці ў дату 80-годдзя Вялікай Перамогі. “Я спадзяюся, праз год у лістападзе-снежні фільм выйдзе на экранах. Ніколі нельга гаварыць наперад. Усё ж такі кіно – справа жывая і залежыць ад многіх абставін. Але наша імкненне і планы такія”, – растлумачыў ён.
Генеральны дырэктар Нацыянальнай кінастудыі “Беларусьфільм” Юрый Аляксей адзначыў, што першай пляцоўкай для абмеркавання супрацоўніцтва стаў фестываль “Лістапад”. “Для нашай краіны падпісанне гэтага дагавора вельмі важна. Мы пакажам, як змагаліся і абаранялі нашу краіну, а таксама ўмацуем дружбу дзвюх дзяржаў. Вельмі важна паказаць карані беларускага народа і моц савецкага народа ў цэлым. Я лічу, што гэта самая галоўная сіла і дух нашай краіны”, – выказаў меркаванне Юрый Аляксей.
Ён дадаў, што цяпер распрацоўваюцца і іншыя сумесныя беларуска-расійскія кінапраекты. “Нядаўна мы прэзентавалі ў Расіі сумесны фільм “Чорны замак”. Спыняцца мы не будзем. У нас ёсць добрае разуменне стратэгіі развіцця Расіі і Беларусі і моцная падтрымка Міністэрства культуры”, – рэзюмаваў Юрый Аляксей.
