У Беларускім культурным цэнтры духоўнага Адраджэння, размешчаным на тэрыторыі храма-помніка ў гонар Усіх Святых і ў памяць аб ахвярах, якія паслужылі выратаванню нашай Айчыны, адкрылася выстава музея “Смаленская крэпасць” пад назвай “Дзеці крэпасці. Народны музей”, перадае карэспандэнт БЕЛТА.
Як расказала дырэктар музея “Смаленская крэпасць” Наталля Калашнікава, выстава прысвечана перыяду з 1943 па 1957 год. “Пасля вызвалення Смаленска яго жыхары вымушаны былі жыць у крэпасці, якая была пазначана ў дакументах нават як месца іх рэгістрацыі. Менавіта таму мы і пачалі вывучаць гэту гісторыю. Выстава з’яўляецца асаблівай яшчэ і таму, што прадстаўленыя фатаграфіі і асабістыя рэчы жыхароў крэпасці мы не куплялі на аўкцыёнах, іх прынеслі гараджане, якія адгукнуліся на нашу просьбу. Гэта рэальна сапраўдны народны музей, у якім сабрана больш за 700 экспанатаў – ад асабістых рэчаў і прадметаў побыту да фатаграфій і дакументаў”, – расказала Наталля Калашнікава.
Кіраўнік музея таксама адзначыла, што сёння, калі гучыць шмат інфармацыі пра вайну, важна таксама гаварыць пра людзей, якія ўнеслі свой уклад у аднаўленне гарадоў і рэгіёнаў. “Гэта была каласальная праца, подзвіг. Жывучы ў вельмі сціплых умовах, прадстаўнікі таго пакалення зрабілі вельмі шмат для развіцця краіны. Калі гаварыць пра ўнікальныя матэрыялы, то ў рамках экскурсіі можна ўбачыць фатаграфіі і пачуць гісторыю пра хлопчыка, які навучыўся вадзіць машыну, а затым, калі Юрый Гагарын прыязджаў у Смаленск, быў яго асабістым вадзіцелем. Калыска, у якой спала немаўля, абраз над ёю, прадметы побыту, сукенкі – усё гэта частка гісторыі канкрэтных сем’яў”, – дадала Наталля Калашнікава.
Прадстаўленая выстава будзе даступна беларускаму гледачу на працягу ўсяго года. У Мінску з ёю можна будзе азнаёміцца ў маі, затым экспазіцыя будзе дэманстравацца ў замкавым комплексе “Мір”, Лідзе, Маладзечне і Гродне.
