У Нацыянальным цэнтры сучасных мастацтваў 27 верасня адкрылася выстава “Архітэктура скрозь стагоддзі”. Яна напоўнена фатаграфіямі архітэктуры розных перыядаў. Намеснік дырэктара Нацыянальнага цэнтра сучасных мастацтваў Алеся Іназемцава падзялілася меркаваннем, што сярод усіх класічных мастацтваў пануе менавіта архітэктура. “Яна заўсёды задавала тон у многіх гістарычных эпохах. І ў музыцы, модзе і нават жаночай прыгажосці”, – адзначыла яна.
Фатаграфія перадае прыгажосць і значнасць архітэктурных збудаванняў на працягу часу. Алеся Іназемцава падкрэсліла, што часта гэты від мастацтва недаацэньваюць. “Дагэтуль нам даводзіцца даказваць, што фатаграфія раўнапраўная з жывапісам або графікай”, – сказала яна.
Архітэктура адлюстроўвае не толькі тэхнічныя і функцыянальныя аспекты будынкаў, але і культурныя, сацыяльныя і эстэтычныя каштоўнасці грамадства. Намеснік дырэктара цэнтра адзначае, што калі яны толькі размясцілі выставу, супрацоўнікі расказвалі, якім яны помняць той час: “Праходзячы міма, я пачула, як людзі дзеляцца гісторыямі. Нехта расказваў, што ў кавярню на фота хадзіў пасля школы. Цяпер гэтай кавярні і няма. Хтосьці гаварыў, што вось на суседняй з будынкам на фота вуліцы быў магазін з самымі смачнымі булачкамі”.
Выстава арганізавана сумесна з беларускім грамадскім аб’яднаннем фатографаў, Беларускім саюзам архітэктараў і Беларускім дзяржаўным архівам кінафотафонадакументаў. Паводле слоў дырэктара Нацыянальнага архіва кінафотафонадакументаў Андрэя Ганчара, на выставе можна прасачыць развіццё Мінска. “Мы прадаставілі для гэтай выставы 9 дакументаў. Даваенны і пасляваенны перыяд. Нам яны былі перададзены газетамі, часопісамі і калекцыянерамі”, – падзяліўся ён.
Старшыня Беларускага грамадскага аб’яднання фатографаў Уладзіслаў Рута адзначыў, што многія з фатаграфій публікуюцца ўпершыню. “Яны сапраўды ўнікальныя. На адным з фота дачка Леаніда Левіна, аднаго з архітэктараў, якія праектавалі мемарыяльны комплекс Хатынь, пазнала свайго бацьку. Да гэтага яна не ведала, што ў яго ёсць такі здымак”, – расказаў ён.
Арганізатары адзначаюць, што выкарыстанне фатаграфій дапамагае захаваць гісторыю архітэктуры ў Беларусі і перадаць наступным пакаленням культурную спадчыну краіны.
