З 3 лютага 2018 г. у Музеі гісторыі Гарадніцы дзейнічае выстаўка “Таямніцы старога гарышча” (са збораў Гродзенскага дзяржаўнага гісторыка-археалагічнага музея). Экспазіцыя выстаўкі знаёміць са светам старых забытых рэчаў, пакінутых некалькімі пакаленнямі гаспадароў на адным з самых загадкавых месцаў дома – гарышчы. Кожны куток музейнага “гарышча” – сапраўдная таямніца, любая рэч у ім нясе дух мінулай эпохі і захоўвае сваю гісторыю. Экспазіцыя выстаўкі змяшчае прадметы гарадскога побыту 1900–1930-х гадоў: мэблю, асвятляльныя прыстасаванні, посуд, гукаўзнаўляльныя апараты, адзенне, аксэсуары, галаўныя ўборы, музычныя інструменты, дзіцячыя цацкі, падручнікі, газеты, часопісы, нататнікі, альбомы, фотаздымкі, дарожныя скрыні, прасы, самавары, скрыні для кавы і гарбаты і іншае.